ببيت ابو مناف...
نزلت بتعب من الدرج ,,,ابتسمت فلك وهي تشوف ابتسامه على وجه ملوك ولو انها ذابلة..
فلك بسلوبها الساخر\هلا وغلا...والله طفشت البارحه ماسهر معي احد ولاتغدى معي احد اليوم...
يامرحبا با الطش والرش...يامرحبا مليون وفي ذمتي مايسدن..!
جلست ملوك بضحكه على الارض وخذت فنجان القهوه من يد فلك..
فلك بعصبيه مصتنعه\هو..ياقشرك يامره!!!فيه فنجال في الصينيه..والا هو حق فلسطين المسلوب دايم من اسرائيل..
ضحكت ملوك بقوه لما توجعت من ظهرها من الضرب\مافيني حيل اصب لي فنجال ثاني ...فنجالك اسهل واقرب..
فلك بضحكه\طيب لاتقطعين علينا...لاتضحكين...
ملوك وهي ترتشف القهوه وتاكل تمره موجوده قدامها\وين ابوي...ماشوفه...
فلك تحط فنجال جديد قدامها\راح لجارنا....آخوه متوفي الله يرحمه...ماسمعتي صوتهم البارح..الله يجبر مصابهم...
كشرت ملوك بحزن واستمرت تشرب فنجالها الي برد من كثر ماحار في يدها...,,
من بعد لحظات الصمت الي استمرت دقايق..,,
ملوك \عمه
فلك ناظرتها بصمت..
ملوك\عمه انتي كنتي تحبين زوجك الاول..عم آسر...
فلك عقدة حواجبها بعصبيه وانتثر بقايا القهوه الي بيدها من الرجفه الي اجتاحت خلايها بلحظه\وليه السؤال...
ملوك \عمتي..ماعمرنا تكلمنا بها الشي...خلينا نسولف..ندرتش..
انا الفضول ذابحني..وخاصة انه سمى عليك بنته الكبيره اكيد
انه يحبك بعد..
فلك برجفة شفايف ماقدرت تحكم فيها\الموضوع هاذا يا مليك يكدرني لاتفتحينه..
ملوك\طيب متى نفتحه..اقولك الفضول بيجلطني...خخخخ
فلك نزلت الفنجان وظهر له صوت واضح با الصينيه..مظهره عصبيتها الواضحه وماخفت..
التزمت ملوك الصمت بعد عصبية عمتها,,
نفسها تعرف القصه كامله باحداثها ومشاعرها..ماتذكر طلاقهم ولاتذكر الااشياء بسيطه
وبسيطه جدااا...
ومع اللحاح ملوك المستمر على عمتها ماتفتح موضوع بتال ابد ابد لملوك او لغيرها,,
حتى زوجها الثاني..ماجلست معه الاكم اسبوع..
,,
,,...
...
وأنا بين التلاقي والفراق ..؟
أدفن العمر وأحفر لي نفق..!
...
...
دخل عناد الجناح تبعه وهو مايقدر يفتح عيونه من التعب والارهاق...
شاف درر حاضنه مفرشه وباديه تحارب النعاس
الذي يغتال بمرح عيونها الجميله...
مشى بخطوات سريعه لجهته رمى نفسه بتعب على السرير واحتضن طفلته الصغيره...
وباسها بقوه على خدها الناعم\درر تبين تنامي ياالخاينه بحضن المخده وتتركين عمومك...
ابتسمت درر بين نومها لدلع عمها الدايم لها..
رمت راسها بطفوله بحضنه الدافي لها واسترق النوم آجفانها الجميله..
ابتسم عناد وهو يشم ريحة الطفوله فيها ...
حضنها بحب ولعب بخصلات شعرها المتناثره على خدها..
على وعسى يغتاله النوم
الذي داعب جفون صغيرته..
لئن التعب والارهاق في بعض الاوقات...يجعلون النوم محال...
غمض عيونه عناد بتعب..وسمع صوت جواله على الهزاز تجاهله ..وغرق بنومه مع طفلته الصغيره...
...
......
...
وأنا بين التلاقي والفراق ..؟
أدفن العمر وأحفر لي نفق..!
...
...
بحديقة قصر...العاجي...
صوت خرير الماء يلطف الأجواء المسائيه...ولاغيرهم يحتل المكان...
الظبي \هو مشغول يابوي والا كان جاء معي..تعرف وظيفته ماتسمح له ابد..
ابو الظبي بمتعاض\والله ياظبي ان رجلس هاذا رافعته لسماء وهو مايسوى بين الرياجيل ..
الظبي بضحكه لكن اظهرت عتبها\ليه يابوي افا والله الحين طارق الفهد مايسوى بين الرياجيل..طيب
كان مازوجته الظبي دامه مايستاهلها...
ابو الظبي\والله شفت الظبي مهتويته قلت ماني بكاسر بخاطرها..ودامه ولد خالتها ..خل سمنا في دقيقنا...خلينا
من ها الحكي..هو كيف شغله ان شاء الله ماشيه اموره ..با العقارات..
الظبي ببتسامه\لا ابشرك اموره طيبه..وقريب بيدخل الحديد وينافسك وتري يابوي بصير بصفه هههه
ابو الظبي\اجل والله صار ظبي ومنصاب..ماهو بخوي الاول...ههههه
الظبي بجديه\عساهم كلهم قبلك بحفرتك يابوي..ان كان وقفت مع احد ضدك...
ابتسم بصمت ...
الظبي\ولاتشيل هم يا سراجهم..والله ان ياسر ماياخذها وانا بنت لك..
ابو الظبي بستفهام\وش ناويه عليه..انا كنت حاس جيتك هاذي فيها شي...جد علماً جديد..؟
الظبي\ايه,,السالفه هاذي طالت واجد...بروح اقطعها من جذورها..وان كان احد فيه خير..يزرعها من جديد..
حك ابو الظبي دقنه\والله يا الظبي..ساعات يروح فيني التفكير..ويبعد..والله يابوس اني ليالي طويله يجافني
النوم فيها...من ثم افرش سجادتي واتهجد...واذا غفيت بعدها لازم لازم اشوف عبدالعزيز..واقعد بعدها متنكد
المشكله لو انه يطلب مني شي..يحكي في الحلم الي يبه..يمكن دين ماقضاه وانا مدري..يمكن يبي يقول لي شي
ثاني ومافهمة عليه...تاخذني ها اليمكن لديار بعيده ..والله ان قلبي ماعاد يتحمل مثل اول..ماهو بحمل صدمات
ونكبات..انا اقول بعض الاحيان واعوذ بالله من الشيطان ان كانه يوسوس للانسان..ان اغض الطرف على ياسر
واخليه ياخذها ..يرمي بشته عليها ويرفعها بسمه....وان رجعنا فيها هي ماهي بدون اصل..هي اصيله..لكن
مش********ن..يعني شي احسن من لاشي..وهو راسه يابس ماله الا الي فيه..
ثار وجه الظبي حتى صار احمر من العصبيه\وشو..!وش تقول........!مايكفينا فضايح وخيبات وتنكيس روس..؟
تجي انت تحكي ها الحكي...بعد تبي الذل يتجدد لنا بمواثيق جديده...انت يايبه تحكي ها الشي...انت...؟
وش بقيت لغيرك..وين تبيني آودي وجهي بعد اذا خذى ياسر بنت أبليس .. وين اوديه من حمولتي.. ومن ربوعنا
وش اقول لهم وش ابرر..وش اقول..!
انفاس الظبي الي ماقدرت تتحكم فيها...من العصبيه ثائره هائجه...\وبعد تبي اسمهم يقترن فينا من جديد...
يالله رحمتك..ارحمني وخذني لك..
ابو الظبي بفزع\استغفري استغفري وش بلاتس...انا افضفض لك..ولا والله ان يشيب شعورهم وماعاد ياخذون
منا احد.....
قاطع هدوئهم ومناقشتهم التي تشبه الهمس صوته الرجولي..
-مساكم الله با الخير....,,
ارتفعت عيون الأثنان لشخص...,,
بتال يجلس على الكرسي المقابلهم\جلستكم وهمسكم مع بعض الظاهر انه مايبشر بخير...
الظبي بخبث\لا ابشرك خير...لاتتعب نفسك بتفكير..
خزها بتال بنظره ناريه..من ثم حول مجرى الحديث لبوه
بتال بنبره قريبه لتهديد\يُبه ياسر ناوي يعرس ها الشهر..او الشهر الي عقبه..فماله داعي تعترضون..
قبضت الجد على العصى اشتدت ..حتى تلونت آصابعه با الحمره..من ثم ناظر الظبي بحده
الظبي بملامح بارده\آيه اذا بشروني بقومة عبد العزيز من قبره...!
.......
...
وأنا بين التلاقي والفراق ..؟
أدفن العمر وأحفر لي نفق..!
...
...
بعد اكثر من ساعه..
بيت العاجي...
ياسر يدلف الباب الرئيسي..ماشاف احد بجلسه الكبيره...توجه لمكان الرئيسي..وتوسطه..
جالت عيونه في الفراغ ..وهو يحاول يبعد اي تفكير في السبب الرئيسي لجيتها...
ماطال تفكيره..حتى سمع صوتها الجامح بئنوثه..
-حيى الله ولد عبد العزيز...
استوى واقف وبملامح مارسمت عليها غير الجديه\حيى الله الظبي..!
جالت الابتسامه بشفتيها ..من ثم فتحت آحضانها لحتضانه..
مامنع ياسر من ضمتها الجميله لصدره..لعلمه الدائم لعشقها لرائحته..المحببه لها..
لكن مازال صدره
بركان يثور ..بالغ في كبته..
فاياسر لم يتجرء كائن من كان على مخاطبته بقلة تهذيب كما فعلت...؟
والاجواء المتكهربه في تلك المكالمه نبئت بعاصفه قادمه..
لكن الذي يراه نسمه بارده تداعبه..
ابعدها من صدره بخفه\ولو اني عاتب على لسانك الي متبري منك...
الظبي وهي تضرب على كل الاوتار\وش فيه لساني..ان كانه قال خطى اقطعه ياولد عبد العزيز
عقد حواجبه ياسر وهو يجلس\محشومه يا الغاليه..محشومه..
,,,...
...
وأنا بين التلاقي والفراق ..؟
أدفن العمر وأحفر لي نفق..!
...
...
با الدور الثاني..وبجناح مناير...
مناير\ماعليك منه بنروح ونرجع وهو ماجاب خبرنا...انتي بس قوي قلبك..وش بيدريه يعني..!
مناهل\وش بيدريه..هذا بتال مايلعب معه يامناير تذكرين يوم كسرتي كلمته ورحتي لعرس الي منعك منه..
مناير بعصبيه\يوه وش ذكرك بسالفه الله لايربحك...خلينا من سالفتك الي بطت كبدي..شفتي ها الظبي
هي كل مالها تحلا والا انا كذا يتخيلي..انتي شفتي شعرها والله الي ماقطع مصارينه الاستشوار مثل شوشتي
يازين خلقة ربي بس..
مناهل تفتح علبة الميرندا\ايه بس الله من الشر..يمه منها من عيونها الواحد مايقدر يطالعها زين
شوفيني كم لي متزوجه اخوها وماتمقلت فيها مثل خلق الله زين..
احس عيونها غريبه ..غصب تخليك مرتبكه..
سبحان الله على قربنا منها غير ماتخلينا ناخذ ونعطي معها..؟
مناير بستخاف\والله ماكنها بنت عمي..ههههه,,مابينا ميانه..انا بس ودي اسئلها عن زيت شعرها..!يختي شفتي
كثره...والا ها البياض الي مقطع عروقها...
يمه منها والله ماتعلم احد حريم والله لو فيه شر ان ينشرونه
لكن الي ينفعهم مايظهر سرهم ابد...حريم قلوبهم سود على بعض...!
مناهل تميل فمها \ياربي منك يامناير..خلقت ربي واضحه..الظبي جمال من الله ..وهي ماشقت فيه..بس
والله انتي الي فيك شر..وغايره..
امتلى وجه مناير بحتقان الدم\وشو وشو..وش قلتي يازينة الطبوع..انا الي فيني شر..والله ان الشر
مرضعته امك معك..وش غايره منه ياحسره..جمال ماهو بطبيعي ولونها يادافع البلا...بياض زايد
مافيه زين..وشعرها مدري هو حقيقي والا هي مسوية فيه بلا..وش هي غالبتني فيه..والله لا حمل زين
مثل العالم كل ماحملت سقطت و لا شكل زين ..انتي بس تقولين هاالكلام من الغل الي فيك علي..
مناهل\انثبري بس انتي وبناتك..قال غالبتني قال..
......
...
وأنا بين التلاقي والفراق ..؟
أدفن العمر وأحفر لي نفق..!
...
صباح جديد...
با الجريده...
جسار يقلب الرصاصه من بين ايديه..\تهديد واضح وصريح...
عناد يرجع بظهره لكرسي \شلون ...خايف...!
عقد جسار حواجبه لعناد وبصوت مايل لاستخفاف\خايف..!الكلمه هذي منفيه من قاموسي..
رجع عناد يشرب من بيالة الشاي الي بيده \توقع التجار الي من جريدتك..والا..عدواة ثانيه انت ناسيهم..
ترى بعض العدوات مثل الحيه تخليك لما تنسى وتقضي عليك...
جسار بهدوء\يمكن بس يبون يحسسوني اني مهدد واني بيدهم والدليل طريقتهم في وصولهم لوسن..يعني
ترى نقدر نئذيها...
عناد \طيب جاك تهديد قبل كذا...
جسار\تهديدات عاديه ماتتعدى الورق او المكالمات...
عناد \البنات انا الي بوديهم واجيبهم من المدرسه..لايروحون لا مع مرافقين ولاسواق..هذي نقطه...النقطه
الثانيه...
سحب عناد مسدس صغير موجود بساقه...\وهذي النقطه الثانيه..احم نفسك بنفسك..لا توثق في احد...
استقرت عيون جسار على المسدس الصغير الي حطه عناد على الطاوله الزجاجيه المائله لبني...
جسار بهدوء\وشغلك...انت بعض الاحيان تجلس يومين مانشوفك...يعني ماحليت المشكله..
عناد بحده\عندك ريان...هذا وقته...لا يغرك حركاته وشكله..ترى انا كذا مره مختبره ومدخله محكات...
ابتسم جسار بهدوئه الدائم..شي جميل..بوسط التهديد والخطر...
تجد من يزاحم الخطر لينتشلك من براثنه..؟
جسار ببرود\الله الحامي...
......
...
وأنا بين التلاقي والفراق ..؟
أدفن العمر وأحفر لي نفق..!
...
...
عيون فلك المتحجره من المفاجئه...؟
ووجها الذي اكتساه جميع الوان الطيف...!!
هذي هي ماتغيرت ملامحها..الا..انها..سرقت كل الأنوثه ..جمال....!
بكل شيء تعدى..حدوده ومقايسه..
رجفت شفايف فلك...ماكانت خفيه عن عيون الظبي المتفحصه...
الظبي \مافيه تفضلي..!والا..ماعرفتيني..وجهلك عرفي...!
فلك بنبره اكتستها البحه\لا..اعرفك...وشلون ماعرفك...؟يآ الظبي...
الظبي وهي تدخل جوات البيت...\ماتغيرتو..كل شي بمكانه...؟
فلك بنبره محايده\من قال ماتغيرنا..مافي شي يظل بمكانه...يآ ..ظبي...حتى انتي كبرتي..
الظبي باابتسامه\بس انتي ماكبرتي..هذا انتي..ملامحك..وارتباكك..
ابتسمت فلك \ماشاء الله..مع انك كنتي طفله في وقتها..لا..صدق بنت ابوك..ماتنسين شي..!اقدر اخدمك بشي..؟
ماظن ياسر عارف بجيتك والا كان عطاني خبر..؟
الظبي بخبث انثى\حلو..ماحب اللف والدوران والأخذ والرد..ابي اشوف ملوك...
فلك\وش تبين فيها..!ماظن بينكم حكي يحكى..والا اقولك..استني لما يجي ياسر..وساعتها احكي معها...
الظبي تنزل شنتطها الانيقه على الطاوله\انتم ماتعرفون ان فيه سلم اسمه الضيافه..!قعدتي طويله..نادي لي
بنت اخوك...وشكلك يافلك..ماتعرفيني زين...ماهو انا الي يرعبها وجود احد...,,
مانتهت من كلامها حتى توسطت ملوك المكان
ملوك بستغراب\السلام عليكم...
الظبي وهي مبتسمه وبصوت قارب للأستهزاء\وعليكم السلام..اكيد انك ملوك..؟
فلك بعصبيه\ظبي...ان كانك ناويه بجيتك هاذي على شر..الزمي حدودك واظهري بكرامتك...ماهي بحلوه
بحق ياسر نطرد عمته..
ملوك حاولت التحكم بملامح وجها ..من سمعت ان الانسانه الي قدامها ماهي الا الشخص المرعب
لها طوال السنوات ..
والشخص الممثل بمومياء مرعبه لها..؟
ماتوقعتها بهذا الجمال الملفت ولا الرقه
والانوثه الواضحه من تقاسيم وجها..
رسمت لها بخيالها شخص بشع..ومن شدة قبحاته لاتستطيع حتى النظر اليه..
من يصر طوال سنوات وسنوات في انتزاع ياسر منها...
الأمان...ومعبر السلام لها دائماً...ذكريات الطفوله..وطهرها ..
الظبي وهي توقف وبصوت بارد\جايه اعقد صفقه..ان صح التعبير...
فلك بستهزاء\ليه شايفتنا تجار تحاورينهم..وتحاولين عقد صفقات معهم...
الظبي متجاهله فلك وموجه كلامها لملوك\شوفي ياملوك..بدخل في صلب الموضوع
لئني اكره المرواغه في الوقت الضايع...انا عارفه وضعكم المالي زين..وخلينا نصحح المصطلح
انا اعرض عليكم مساعده..بيت بحي فخم..سياره..مبلغ ثابت ينزل لك شهرياً..
وتسديد كامل لكل المستحقات
الماليه الي يطالبونك فيها من ديانه او غيرهم..,,
وبا المقابل..,,تنفصلين عن ياسر..بهدوء ومن غير شوشره..؟
فلك بنبره حاده\انتم عايله مهبل ولا خلقتكم كذا..انتم ليه متبلينا من بدة خلق الله..انتم مافيه ضمير جواتكم
يعذبكم مافي وازع او رداع ديني..انتم تحسبون خلق الله عبيد عندكم..اصحو..اصحو..مانتم الي تدور عليكم
المجره ومانتم سر الحياه وايقونة الوجود...اصحو...
الظبي مازالت متجاهله الوجود الكلي لفلك...وموجها كلامها لملوك\ياسر ملكته عليك..او خليني اقول حبه لك..
مجرد تمسك با الماضي الي حنى طلعنه منه با الغصب..وكرد فعلي عاند وتمسك في شخص من الماضي..
بس عشان يفرض وجوده ورايه علينا...صدقيني ياملوك ياسر ماهو رهان كسبان بنسبه لك..,,
ابتسمت بخبث\والا..وش تفسرين علاقته الكثيره بوسطه وبحياته بشكل عام..,.؟
غاصت سكين احسست فيها ملوك بين حنايا قلبها...من غيرها يعرف..بعلاقات ياسر...الظبي...!ومن غيرها...!
لها الدرجه علاقته مكشوفه..وواضحه لناس...لها الدرجه تهاونه بمشاعرها وجرح الدايم لها...,,.؟
فلك بعصبيه\لاتصدقينها ماعليك منها..وانتي بعد اذا ماطلعتي الحين صدقني ماراح يحصل طيب...؟
الظبي باابتسامه وهي تشيل شنطتها\لا..اهدي..طالعه..بس مو خوف من جنابك..بس تقريباً خلص كلامي
وبقى كم كلمه لازم اقولها..,,
ناظرت ملوك ووجهت الكلام لثنيتن\انا قلت لكم البند الاول من الصفقه..البند الثاني ياحلوين..ان خذته ست
الحسن والزين..,بينفتح عليكم باب ماراح يتسكر...واوله..اخوكم ها المنحرف...ماراح نقول يتعاطى...لئن ها
التهمه بسيطه...بنقول يروج...!وشرايكم..؟خلو ها الشي في بالكم..وتذكرو ان الي يحبون مقرن كثير
ويخدمونه بأشياء ماتخطر لكم على بال...عن اذنكم..
.....
...
وأنا بين التلاقي والفراق ..؟
أدفن العمر وأحفر لي نفق..!
...
...
..
..
نقف هنا..
..
..
..
همسة محبه..نشرت صحيفة التايمز البريطانية الشهيرة مقالا في عددها الصادر
بتاريخ 6 فبراير 2009 تحت عنوان(Hills are alive with the sound of ants
- talking to each other) (التلال حية بأصوات النمل وهو يتحدث مع بعضه البعض)..
المقال يتحدث عن اكتشافات علمية جديدة
عن خاصية التخاطب وتبادل الحديث في مملكة النمل..
ويذكر المقال أن الاكتشافات الحديثة قد بينت أن لغة التخاطب
عند النمل متطورة ومتقدمة على نحو كبير أكبر مما كان يعتقد قبل ذلك.
الإعجاز العلمي في القرآن:
لقد اخبر القرآن الكريم عن مخاطبة نملة صوتياً معشر النمل بقوله
{ قَالَتْ نَمْلَةٌ يَا أَيُّهَا النمل ادخلوا مساكنكم } وتحذيرهم أن تدوسهم أقدام
نبي الله سليمان وجنوده واعتذرت عن سليمان بقولها (لَا يَحْطِمَنَّكُمْ سُلَيْمَانُ وَجُنُودُهُ وَهُمْ لَا يَشْعُرُونَ)
فلو شعروا بهم لم يحطموهم وهذا أثبات من القرآن
ان أمة النمل لديهم عقول وإدارك بما حولهم ويتواصلون مع بعضهم صوتياً،
وهذا ما أثبته الاكتشاف الأخير كما فصلنا.
لقد أثبت المفسرون نطق النمل (على غرابته في زمانهم )
ورجحوا ان النملة الناطقة هي أنثى (لعلها هي ملكة النمل)
وأنكروا على من يجنح إلى الاستعارة التمثيلية لنفي قول النمل صوتيا.
وقفة تأمل:
إلى المشككين في صدق نبي الله محمد صلى الله عليه وسلم..
أليس الأخبار عن كلام النمل صوتياً قبل أكثر من 1400سنة لدليل دامغ على صدقه
صلى الله عليه وسلم؟! من اين علم بهذا ومن علمه؟الجواب
قال الله تعالى
قُلْ أَنْزَلَهُ الَّذِي يَعْلَمُ السِّرَّ فِي السَّمَاوَاتِ وَالْأَرْضِ إِنَّهُ كَانَ غَفُورًا رَحِيمًا )(الفرقان:6).
وقال تعالى
فَإِنْ لَمْ يَسْتَجِيبُوا لَكُمْ فَاعْلَمُوا أَنَّمَا أُنْزِلَ بِعِلْمِ اللَّهِ وَأَنْ لَا إِلَهَ إِلَّا هُوَ فَهَلْ أَنْتُمْ مُسْلِمُونَ )(هود:14).